Ljós náttúrunnar - Sýning á myndlist, skrautrituðum ljóðum og þæfðum ullarverkum

í hlöðunni í Króki, Garðahverfi - Garðaholti í Garðabæ

Ljósblik á jörð og himni, glitrandi vatn og íshellar, glóandi hraun og norðurljós. Ljós náttúrunnar í ýmsum myndum er þemað á sýningu Rúnu K. Tetzshner en hún hefur undanfarna mánuði unnið við listsköpun í Króki á Garðaholti. Laugardaginn 8. júní kl. 15-18 opnar Rúna sýningu í hlöðunni í Króki þar sem sjá má afraksturinn og kynnast hinni sérstæðu blönduðu tækni sem hún hefur þróað. Rúna notar m.a. vatnstússliti og glitrandi liti sem bræddir eru á pappírinn. Til sýnis eru auk þess skrautrituð ljóð Rúnu sem kallast á við myndirnar.

Rúna hefur fengið móður sína, Kömmu Níelsdóttur hönnuð, til liðs við sig og gefur listhandverk eftir hana sýningunni aukna mýkt. Sjöl Kömmu þæfð úr ull og ullarskúlptúrar með formi íslenskra fjalla mynda hliðstæður við norðurljósaslæður, jökla og eldfjöll í myndlist Rúnu.

Markmiðið með sýningunni er að breiða út ljósið og fallegan boðskap. 

Við opnunina les Rúna ljóð og írski trúbadorinn og Íslandsvinurinn Leo Gillespie syngur og leikur. 

Í fjósinu í Króki verður sérstök örsýning fyrir börn og hægt er að skoða safnið í Króki.

Sýningin stendur til og með 16. júní og er opin alla daga kl. 13-18. 

Krókur og Garðahverfi

Krókur er lítill bárujárnsklæddur burstabær sem var endurbyggður úr torfbæ árið 1923. Í Króki eru varðveitt gömul húsgögn og munir sem voru í eigu hjónanna Þorbjargar Stefaníu Guðjónsdóttur og Vilmundar Gíslasonar. Þorbjörg flutti í Krók vorið 1934 og bjó þar til ársins 1985. Afkomendur Þorbjargar og Vilmundar gáfu Garðabæ bæjarhúsin í Króki ásamt útihúsum og innbúi árið 1998. Bærinn er nú varðveittur sem safn og er gott dæmi um húsakost og lifnaðarhætti alþýðufólks í þessum landshluta á fyrri hluta 20. aldar. 

Rúna K. Tetzschner fékk úthlutað vinnuaðstöðu í Króki en undir einni burstinni er nú vinnustofa fyrir listamann. Þess má svo geta að Rúna tengist Króki og Garðahverfi einnig með öðrum hætti því hún annaðist fornleifaskráningu á svæðinu í starfi sínu sem sérfræðingur Þjóðminjasafnsins ásamt fornleifafræðingunum Ragnheiði Traustadóttur og Guðrúnu Sveinbjarnardóttur og skrifaði skýrsluna Garðahverfi fornleifaskráning 2003 sem út kom hjá Þjóðminjasafninu.

Vegna fornleifa á svæðinu var hætt við fyrirhugaðar byggingaframkvæmdir og er það nú varðveitt í heild sinni. Þótt Garðahverfi sé umlukið þéttri byggð Garðabæjar og Hafnarfjarðar er þar friðsæl sveit og myndarbúskapur á jörðum sem hafa verið í ábúð öldum saman. Í Garðahverfi var áður fyrr útræði með tilheyrandi verbúðum og tómthúsum og vísir að svolitlu sjávarþorpi kringum kirkjustaðinn á Görðum.

Listamennirnir

Rúna K. Tetzschner starfar jafnhliða við listir og fræði. Hún á að baki sjö ára nám í Myndlistaskólanum í Reykjavík, auk íslenskunáms við Háskóla Íslands og stundar nú M.A. nám í norrænni trú. Rúna hefur starfað á Þjóðminjasafni Íslands o.fl. söfnum, er höfundur ljóðabóka, barnabóka og fræðibóka. Hún hefur m.a. haldið fjölda myndlistarsýninga í Danmörku þar sem hún dvaldi langdvölum 2008-2012 og er nú komin heim tíl Íslands

Kamma Níelsdóttir sérhæfir sig í þæfðri ull og hönnun á ullarvörum. Hún rak í fjölmörg ár Kömmuskóla í Garðabæ, listasmiðju þar sem leitast var markvisst við að örva börn til sjálfstæðrar listrænnar sköpunar. Kamma er leikskólakennari að mennt og var m.a. leikskólastjóri leikskólans Kirkjubóls í Garðabæ frá því sá skóli var stofnaður 1985 til ársins 2007. Kamma er jafnframt móðir Rúnu sem naut góðs af því að alast upp á heimili skapandi konu.

Leo Gillespie er írskur trúbador sem ferðast um allan heim og flytur tónlist sína en hann semur sjálfur bæði lög og teksta. Ísland í miklu uppáhaldi hjá honum enda hefur hann oftsinnis heimsótt landið síðustu tvo áratugi og unnið með íslenskum tónlistarmönnum svo sem KK.